Kæru bæjarbúar, aðrir gestir.
Ljósanótt var fyrst haldinn 1. september árið 2000 og markaði hátíðin nýja stefnu í menningarmálum Reykjanesbæjar á nýrri öld. Samhliða Ljósnótt 2000 var umhverfislistaverkið, Lýsing Bergsins, vígt og er lýsingin í dag undirtón og táknmynd fyrir hátíðina.
Menning er einn af mikilvægustu þáttum í samfélagi manna og með tengingu við daglegt líf og fjölskylduna erum við að byggja á undirstöðuþörfum mannsins þ.e. að koma saman og njóta lífsins hver á sinn hátt. Þannig er það íslenskri þjóð mikilvægt að uppgötva menningu í daglegu lífi og miðla af reynslu sinni til annara eins gert er á Ljósanótt í Reykjanesbæ.
Ljósanótt 2002 verður haldinn fyrsta laugardaginn í september sem ber upp á þann sjöunda í ár. Ljósanefndin er sú sama og s.l. ár og er því vel skipuð einstaklingum með þekkingu með mismunandi áherslu á viðfangsefninu. Með því tryggjum við að allir bæjarbúar svo og aðrir gestir finni eitthvað við sitt hæfi. Í ár verður atriðum hátíðarinnar á dagskrá frá fimmtudegi til sunnudags með hápunkti á laugardag eins og áður.
Það er einlæg trú mín að með settum markmiðum Ljósanætur verði hátíðin sú sem við höfum nú þegar upplifað til langrar framtíðar. Mikilvægast er að allir bæjarbúar séu virkir þátttakendur og leggi sitt af mörkum með endurgjaldi hrifningar og hláturs gesta að launum.
Verum metnaðarfull og gerum Ljósanótt, menningar- og fjölskyldudaga Reykjanesbæjar af glæsilegustu hátið landsins - það gerum við með þinni aðstoð.
Höfum það skemmtilegt, verum saman á Ljósanótt.
Steinþór Jónsson,
Formaður undirbúningsnefndar.