Nú er lag að klára brautina!!
[Annað] - 20.01.2005 -
Í Morgunblaðinu í gær og í dag var athyglisverð frétt varðandi opnun útboða við gerð Suðurstrandarvegar. Alls buðu 22 verktakar víða að af landin í 5,6 kílómetra kafla. Bæði verðið og þáttakan í útboðinu eru óumdeild vísbending um að að verkefnaskortur sé í atvinnugreininni. Lægsta tilboðið var aðeins 23,6% af kostnaðaráætlun sem telja verður óraunhæft en 5 önnur tilboð voru undir 70% af kostnaðaráætlun en eitt þeirra var aðeins 56,3% af áætlun. Þetta gerist á sama tíma og framlög til vegagerðar eru skorin niður til að sporna við "þenslu" sem greinilega á ekki við í þessari atvinnugrein. Öll stóru og öflugu verktakafyrirtækin tóku þátt í útboðinu og var Háfell, eitt þeirra félaga sem vann við fyrri hluta Reykjanesbrautar, t.d. með 65,2% af kostnaðaráætlun og næst lægstir af þessum raunhæfu tilboðum. Þessi prósenta er sú sama og verktakarnir buðu í fyrri hluta brautarinnar og áhugahópurinn hefur fullyrt að nú væri mögulegt að ná.
Með þessar upplýsingar uppi á borði er fátt sem ætti að koma í veg fyrir skýra ákvörðunartöku samgönguyfirvalda um að klára Reykjanesbraut alla leið. Annað væri bæði verklegt og pólitískt glapræði. Hönnun brautarinnar liggur fyrir, útboðsgögn gætu verið klár á 2-3 vikum, vilji þingmanna hefur í orði verið einróma um að klára verkið, raunverð eru með allra hægstæða móti og verktakar með getu til að klára verkið innan ársins sé þess óskað.
Eins og fram hefur komið er gerð vegaáætlunar nú í gangi en áhugahópurinn mun í fyrramálið eiga fund með þingmönnum kjördæmisins í Alþingishúsinu þar sem undirbúningur borgarafundar 7. febrúar n.k. verður ræddur. Að auki munu þingmenn tjá sig um stöðu málsins eins og hún kemur þeim fyrir sjónir. Eitt er víst - nú er lag að klára þetta mikilvæga verkefni en með því eru samgönguyfirvöld að fylgja eftir góðu verki og tryggja öryggi vegfarenda Reykjanesbrautar um leið og örugg tenging höfuðborgarinnar við alþjóðaflugvöllinn er tryggð til langrar framtíðar.
Til baka
|