KALLINN VARÐ KLÖKKUR í Stapanum á mánudagskvöld þegar Sturla Böðvarsson samgönguráðherra tilkynnti það óvænt að tvöföldun Reykjanesbrautar muni klárast fyrr en síðar með því að verkið verði allt boðið út á vormánuðum. Ekki átti Kallinn von á þessu óvænta útspili, þegar heyrst hafði að skera ætti niður í vegamálum.
ÞAÐ ER HINS VEGAR RÖKRÉTT framhald af uppbyggingu við millilandaflugið og aukningu í komu ferðamanna að taka á móti fólki með mannsæmandi samgöngum. Brautin hefur tekið skelfilegan toll á síðustu árum en það er trú Kallsins að betri Braut leiði til fækkunar slysa. Sturla samgönguráðherra er á réttri braut og honum ber að þakka sitt framlag og eins Halldóri Ásgrímssyni forsætisráðherra, sem samkvæmt upplýsingum Kallsins átti einnig stóran þátt í ákvörðuninni.
ÞINGMENN SUÐURKJÖRDÆMIS hafa staðið saman sem einn maður í málinu og enginn þeirra reynt að eigna sér málið umfram annan. Þessu vill Kallinn hrósa og einnig áhugahópi um örugga Reykjanesbraut. Þar fer hópur manna sem hefur unnið málið af festu og öryggi án þess að fara með hávaða og látum. Verst þykir Kallinum að sjá ekki konu í þeim hópi.
ÞAÐ ERU ORÐIN FJÖLMÖRG ÁR síðan tíðarfarið hefur verið eins og það hefur verið frá áramótum. Götur hafa verið undir snjó svo dögum skiptir. Kallinn má til með að skammast örtlítið út í snjómoksturinn enn og aftur. Nú er það hreinsun Reykjanesbrautarinnar títtnefndu sem á hug Kallsins allan. Þar er verktakinn ekki að standa sig vel. Kallinn á oft erindi til borgarinnar og því miður þá hefur tvöföld Reykjanesbrautin ekki verið að nýtast ökumönnum, sem best, þar sem snjóruðningstækin virðast bara halda einni akrein hreinni. Þá ættu þeir sem annast lýsinguna á Reykjanesbraut að taka vel á móti Lionsmönnum næst þegar þeir eru að selja perur því ljósin vantar í alltof marga staura. Kveðja, Kallinn@vf.is