Markaðs-, atvinnu- og menningarsvið (MOA) ásamt Umhverfis- og tæknisviði Reykjanesbæjar stóðu fyrir morgunverðarfundi um framtíð verslunar og þjónustu í Reykjanesbæ í morgun kl. 8:00 í húsi Matarlystar í Reykjanesbæ. Fundur var mjög fjölmennur, málefnalegur og jákvæður. Hann var vel skipulagður af Markaðs- og atvinnumálaskrifstofu og erindin voru góð. Í lok fundarins stóð Steinþór Jónsson frá Hótel Keflavík upp og tilkynnti stofnun undirbúningsnefndar fyrir samtök í verslun og þjónustu. Lagði hann fram 100,000 kr fyrir hönd Hótel Keflavíkur og sömu upphæð fyrir Sparisjóðinn í Keflavík. Sagði Steinþór mikilvægt að kraftur í málefnum verslunar og þjónustu kæmi innan frá og til þess eru þessi samtök stofnuð. Stefnt væri að fjárhagslega sterku félagi með allt að 5 milljóna króna stofnfé sem kæmi þá að stærstum hluta frá stofnunum, bönkum, verkalýðs- og lífeyrissjóðum auk hagsmunaaðila í verslun og þjónustu. Í máli hans kom fram að framtíðarskipan verslunar og þjónustu verður aldrei sterk með aðkomu sveitarfélags og embættismanna eingöngu. Aðkoma hagsmunaaðila er lykilatriði til að ná fram sterkri stöðu verslunar og þjónustu. Í framhaldi af átaki sem Hótel Keflavík stóð fyrir í desember með svokölluðum "Verslunarferðum til Reykjanesbæjar", þar sem lagðar voru til gistingar til að styðja við verslun í bænum, var kastað fram þeirri hugmynd að stofnun samtaka vinnuveitenda í Reykjanesbæ, bæði í verslun og þjónustu. Markmið félagsins yrði að standa vörð um og efla verslun og þjónustu í Reykjanesbæ, hafa áhrif á Bæjaryfirvöld með stefnumörkun beggja að leiðarljósi t.d. með aðkomu Markaðs- og atvinnumálaskrifstofu.
|